एजुकेसन दैनिक
सोमबार, असार २२, २०८३
काठमाडौँ। शंकरदेव क्याम्पसलाई एजुकेशन एक्सिलेन्स अवार्ड्स २०२६ मा एक्सिलेन्स इन म्यानेजमेन्ट एजुकेसन अवार्ड बाट सम्मान गरिएको छ।
एजुकेसन दैनिक र आई.वाई.एल.एफ. — इन्टरनेसनल यङ लिडर्स फोरमको आयोजनामा, अप्टिमेज ग्लोबलको प्रस्तुति तथा फ्युचर एड्भान्टेजको सहकार्यमा सम्पन्न समारोहमा शंकरदेव क्याम्पसलाई उक्त अवार्ड प्रदान गरिएको हो। क्याम्पसका तर्फबाट क्याम्पस प्रमुख डा. कपिल खनालले अवार्ड ग्रहण गर्नुभएको थियो।
कार्यक्रम वरिष्ठ व्यक्तित्व कर्ण शाक्यको प्रमुख आतिथ्यतामा सम्पन्न भएको थियो। समारोहमा शिक्षाविद् रमेश सिलवाल, बैंकर मनोज ज्ञवाली, कृष्ण अधिकारी, रञ्जना प्रधान, नरेश प्रसाद श्रेष्ठलगायत विशिष्ट व्यक्तित्वहरूको विशेष उपस्थिति रहेको थियो।
शंकरदेव क्याम्पसले व्यवस्थापन शिक्षा, शैक्षिक गुणस्तर, विद्यार्थी विकास, नेतृत्व निर्माण र व्यावहारिक सिकाइलाई प्राथमिकतामा राख्दै उच्च शिक्षाको क्षेत्रमा उल्लेखनीय योगदान पुर्याउँदै आएको छ। क्याम्पसले व्यवस्थापन शिक्षामार्फत विद्यार्थीहरूलाई ज्ञान, सीप, आत्मविश्वास र व्यावसायिक क्षमतासँग जोड्ने कार्य गर्दै आएको छ।
क्याम्पसको शैक्षिक योगदान, व्यवस्थापन शिक्षामा देखिएको उत्कृष्ट भूमिका र संस्थागत प्रतिबद्धताको कदर गर्दै आयोजकले उक्त अवार्ड प्रदान गरेको जनाएको छ।
समारोहमा शिक्षा क्षेत्रका विभिन्न संस्था, कलेज, विद्यालय, शिक्षा नेतृत्वकर्ता तथा समाजमा सकारात्मक योगदान पुर्याउने व्यक्तित्वहरूलाई विभिन्न विधामा सम्मान गरिएको थियो।
आयोजकका अनुसार एजुकेशन एक्सिलेन्स अवार्ड्स २०२६ को उद्देश्य शिक्षा क्षेत्रमा उत्कृष्ट कार्य गर्दै आएका संस्था तथा व्यक्तित्वहरूको योगदानलाई पहिचान, सम्मान र प्रोत्साहन गर्नु हो। यस्ता अवार्ड कार्यक्रमले शैक्षिक संस्थाहरूलाई अझ गुणस्तरीय, जिम्मेवार र भविष्यकेन्द्रित शिक्षा निर्माणका लागि प्रेरित गर्ने विश्वास आयोजकले व्यक्त गरेको छ।
