एजुकेसन दैनिक
बिहीबार, असार ३२, २०८३
काठमाडौँ/ ३२ असार – विद्यार्थीलाई शैक्षिक ज्ञानसँगै जीवनोपयोगी सीप, प्रभावकारी सञ्चार, नेतृत्व क्षमता, वित्तीय साक्षरता र व्यावहारिक दक्षता प्रदान गर्ने उद्देश्यले आरम्भ स्कुल र फ्युचर एड्भान्टेजबीच औपचारिक सहकार्य सुरु भएको छ।
फ्युचर एड्भान्टेजका संस्थापक सफ्रिन सिलवाल तथा आरम्भ स्कुलका अध्यक्ष एवं प्रिन्सिपल नरेशप्रसाद श्रेष्ठ, भाइस प्रिन्सिपल दिनेश श्रेष्ठ र भाइस प्रिन्सिपल रोसेट डेला रोजा तामाङले साझेदारीसम्बन्धी समझदारीपत्रमा हस्ताक्षर गरेका हुन्। समारोहमा फ्युचर एड्भान्टेजका ब्रान्ड एम्बेसडर तथा गायक निर्णय श्रेष्ठ ‘एनएसके’ र प्रेरणादायी वक्ता रमन भट्टराईको समेत उपस्थिति थियो। सम्झौताअनुसार विद्यालयका विद्यार्थीले सार्वजनिक वक्तृत्व, सञ्चार कला, नेतृत्व विकास, समूहकार्य, समस्या समाधान, उद्यमशील सोच, वित्तीय साक्षरता, अनुशासन र जिम्मेवारी विकाससम्बन्धी कार्यक्रममा सहभागी हुने अवसर प्राप्त गर्नेछन्।
फ्युचर एड्भान्टेज विद्यार्थीलाई परीक्षाका लागि मात्र नभई जीवन, करिअर र भविष्यका अवसरका लागि तयार गर्ने अनुभवमा आधारित संरचित विद्यार्थी रूपान्तरण कार्यक्रम हो। यसले सीप, सोच, चरित्र र अनुभवलाई विद्यार्थी विकासका चार प्रमुख आधारका रूपमा अघि सारेको छ।कार्यक्रमको सिकाइ पद्धति ‘लर्निङ बाइ डुइङ’ अर्थात् गरेर सिक्ने अभ्यासमा आधारित छ। विद्यार्थीलाई गतिविधि, चुनौती तथा वास्तविक जीवनसँग सम्बन्धित परिस्थितिमा सहभागी गराउँदै बोल्न, प्रस्तुति दिन, समूहमा सहकार्य गर्न, निर्णय लिन, नेतृत्व गर्न र अनुभवबाट सिक्न प्रेरित गरिन्छ।
फ्युचर एड्भान्टेज अप्टिमेज ग्लोबल, अष्ट्रेलियाद्वारा सञ्चालित कार्यक्रम हो। अप्टिमेज ग्लोबलले नेपाललगायत विभिन्न देशमा फ्युचर एड्भान्टेजमार्फत विद्यार्थीलाई आत्मविश्वासी, सक्षम, जिम्मेवार र भविष्यका लागि तयार बनाउने अभियान अघि बढाएको जनाएको छ। आरम्भ स्कुलका अध्यक्ष एवं प्रिन्सिपल नरेशप्रसाद श्रेष्ठले विद्यार्थीको वास्तविक सफलता शैक्षिक नतिजामा मात्र नभई उनीहरूको सोच, व्यवहार, आत्मविश्वास र जिम्मेवारी निर्वाह गर्ने क्षमतामा समेत देखिनुपर्ने बताए। विद्यालयले बालबालिकालाई सिर्जनशील, संस्कारयुक्त, आत्मनिर्भर र नेतृत्व लिन सक्ने नागरिकका रूपमा विकास गर्न प्राथमिकता दिँदै आएको उनको भनाइ छ।
उनका अनुसार फ्युचर एड्भान्टेजसँगको सहकार्यले विद्यार्थीलाई आफ्नो प्रतिभा पहिचान गर्न, विचार स्पष्ट रूपमा प्रस्तुत गर्न, चुनौतीको समाधान खोज्न तथा सिकेको ज्ञानलाई दैनिक जीवनमा प्रयोग गर्न थप अवसर प्रदान गर्नेछ।फ्युचर एड्भान्टेजका संस्थापक सफ्रिन सिलवालले आरम्भ स्कुलसँगको साझेदारी विद्यार्थीको समग्र विकास र भविष्य तयारी अभियानको महत्वपूर्ण कदम भएको बताए। यस सहकार्यले विद्यालयमा सक्रिय सहभागिता, नेतृत्व अभ्यास, सञ्चार संस्कृति र जिम्मेवारीको भावना थप सुदृढ बनाउने अपेक्षा गरिएको छ।
